Day: September 28, 2024

കുട്ടികളെപ്പറ്റി സംസാരിച്ചുകൊണ്ടിരിക്കുമ്പോള്‍ ഈശോ ഇപ്രകാരം അരുള്‍ചെയ്തു: ഈ കുട്ടികളില്‍ ആരേയും നിന്ദിക്കാതിരിക്കാന്‍ ശ്രദ്ധിച്ചുകൊള്ളുവിന്‍. സ്വര്‍ഗ്ഗത്തില്‍ അവരുടെ ദൂതന്മാര്‍ എന്റെ സ്വര്‍ഗ്ഗസ്ഥനായ പിതാവിന്റെ മുഖം ദര്‍ശിച്ചുകൊണ്ടാണിരിക്കുന്നതെന്ന് ഞാന്‍ നിങ്ങളോടു പറയുന്നു. (മത്താ 18:10) . ഈ വാക്കുകളില്‍നിന്ന് ഓരോ മനുഷ്യനും ഓരോ കാവല്‍മാലാഖയുണ്ടെന്ന് മനസ്സിലാക്കാവുന്നതാണല്ലോ. ഓരോ രാജ്യത്തിനും ഓരോ നഗരത്തിനും ഓരോ സ്ഥാപനത്തിനും ഓരോ കാവല്‍മാലാഖയുണ്ടെന്ന് അഭിപ്രായമുണ്ട്.
മാലാഖമാരെപ്പറ്റി പഴയനിയമത്തിലും പുതിയ നിയമത്തിലും പലയിടത്തും പ്രതിപാദിച്ചിരിക്കുന്നതായി കാണാം. മിഖായേല്‍, ഗബ്രിയേല്‍, റാഫേല്‍ എന്നിവരുടെ പേരുപറഞ്ഞ് വിവരിച്ചിട്ടുണ്ട്. മാലാഖമാര്‍ സര്‍വഥാ അരൂപികളാണ്. ചിറകുകളോടുകൂടി മാലാഖമാരെ ചിത്രിക്കുന്നുണ്ടെങ്കിലും അവര്‍ക്ക് ചിറകുകളുമില്ല, ശരീരവുമില്ല. ലോകസൃഷ്ടിയോടുകൂടെ മാലാഖമാരേയും ദൈവം സൃഷ്ടിച്ചു. അവരില്‍ ചിലര്‍ അഹങ്കാരം നിമിത്തം പാപം ചെയ്തു ദൈവകോപത്തിന് വിധേയരായി. അവരാണ് പിശാചുക്കള്‍ അഥവാ അധഃപതിച്ച മാലാഖമാര്‍.
മാലാഖമാരുടെ പരിപൂര്‍ണ്ണതയനുസരിച്ച് മൂന്നു ഹയരാര്‍ക്കികളുണ്ട്; ഓരോ ഹയരാര്‍ക്കിയിലും മൂന്നു വൃന്ദങ്ങളുണ്ട്. (1) സ്രാപ്പേന്മാര്‍, കെരൂബുകള്‍, സിംഹാസനങ്ങള്‍. (2) അധികാരികള്‍, ശക്തികള്‍, ബലവത്തുക്കള്‍ (3) പ്രധാനികള്‍, മുഖ്യദൈവദൂതന്മാര്‍, ദൈവദൂതന്മാര്‍. ദൈവദൂതന്മാര്‍ അഥവാ മാലാഖമാര്‍ എന്ന പദം 9വൃന്ദം മാലാഖമാരെപ്പറ്റിയും പ്രയോഗിക്കുമെങ്കിലും കാവല്‍ മാലാഖമാര്‍ ഈ ഒമ്പതാമത്തെ വൃന്ദത്തില്‍നിന്നു മാത്രമാണ് തിരഞ്ഞെടുക്കപ്പെടുന്നത്. അവര്‍ നമ്മളെ കാത്തുകൊണ്ടിരിക്കുന്നു. അവരോട് നമുക്ക് സ്‌നേഹവും കൃതജ്ഞതയും ഉണ്ടായിരിക്കേണ്ടതാണ്. പാപത്തിന്റെ ഗൗരവം കുട്ടികള്‍ക്ക് കാണിച്ചുകൊടുക്കാന്‍ കരയുന്ന കാവല്‍ മാലാഖയെ കുട്ടിയുടെ അടുക്കല്‍ നിറുത്തിയിരിക്കുന്ന ചിത്രമുണ്ട്. മാലാഖമാര്‍ക്ക് കരയുവാനോ ചിരിക്കുവാനോ കഴിയുകയില്ലെങ്കിലും യാഥാര്‍ത്ഥ്യത്തിന്റെ പ്രതീകമായിരിക്കും അവരുടെ കരയലും വാദ്യഘോഷങ്ങളും കാഹളവിളികളും.
‘എന്റെ കാവല്‍മാലാഖേ, അങ്ങയുടെ സൂക്ഷത്തിന് ഏലപിച്ചിരിക്കുന്ന എന്നെ കാത്തുസൂക്ഷിക്കണമേ, ഭരിച്ച് പരിപാലിക്കണമേ, ബുദ്ധിക്കു പ്രകാശം നല്കണമേ. എന്റെ സ്‌നേഹവും കൃതജ്ഞതയും അങ്ങ് സ്വീകരിക്കേണമേ’ എന്നു പ്രഭാതത്തിലും രാത്രി വിശ്രമത്തിനുമുമ്പും ചൊല്ലുന്നത് ഉത്തമമാണ്.
കാവല്‍ മാലാഖമാര്‍ റോമിലെ വിശുദ്ധ ഫ്രാന്‍സിസ്, ജെമ്മാ ഗല്‍ഗാനി മുതലായ പല വിശുദ്ധന്മാര്‍ക്കും ദൃശ്യരായിട്ടുണ്ട്; സേവനങ്ങള്‍ ചെയ്തുകൊടുത്തതായും പറയുന്നുണ്ട്.

സ്റ്റാറ്റസ് വീഡിയോ ഡൗണ്‍ലോഡ് ചെയ്യാന്‍ ക്ലിക്ക് ചെയ്യൂ:

https://malabarvisiononline.com/wp-content/uploads/2024/09/Kaval-Malakha.mp4

ചെറുപുഷ്പം എന്നറിയപ്പെടുന്ന മരിയാ ഫ്രാന്‍സിസ് തെരേസാ മാര്‍ട്ടിന്‍ 1873 ജാനുവരി 2-ാം തീയതി അലെന്‍സോണില്‍ ജനിച്ചു. പിതാവ് ളൂയിമാര്‍ട്ടിന്‍ സാമാന്യം ധനമുള്ള ഒരു പട്ടുവ്യാപാരി ആയിരുന്നതുകൊണ്ട് മരിയാ, പൗളി, ലെയോനി, സെലിന്‍, തെരേസാ എന്നീ അഞ്ചു കുട്ടികളും ഡാന്‍സിലും പ്രേമവ്യാപാരങ്ങളിലും മുഴുകി ലൗകായതികരായി മാറാമായിരുന്നു. എന്നാല്‍ നാലു പേര്‍ കര്‍മ്മലീത്താ സഭയിലും ലെയോനി വിസിറ്റേഷന്‍ സഭയിലും ചേരുകയാണ് ചെയ്തത്. തെരേസായ്ക്ക് നാല് വയസ്സുള്ളപ്പോള്‍ അമ്മ മരിച്ചു. താമസിയാതെ മാര്‍ട്ടിന്‍ ലിസ്യൂവിലേക്ക് മാറി താമസിച്ചു. പത്തു വയസ്സു പൂര്‍ത്തിയായപ്പോള്‍ ത്രേസ്യയ്ക്ക് ഗുരുതരമായ ഒരു രോഗം പിടിപെട്ടു. ഒരു മാസത്തോളം ത്രേസ്യ രോഗിണിയായി
ക്കിടന്നു. 1883 മേയ് 13-ാം തീയതി പെന്തക്കുസ്താദിവസം ത്രേസ്യായുടെ മുറിയില്‍ ഇരുന്നിരുന്ന വിജയമാതാവിന്റെ രൂപം ത്രേസ്യയെ നോക്കി പുഞ്ചിരി തൂകി ; ത്രേസ്യയുടെ ആലസ്യം നീങ്ങി. അന്ന് പ്രകടമായ ദൈവമാതൃസ്‌നേഹം അന്ത്യംവരെ ത്രേസ്യാ ആസ്വദിച്ചു.

പതിനഞ്ചാമത്തെ വയസ്സില്‍ കര്‍മ്മലീത്താ മഠത്തില്‍ ചേരാനുള്ള അനുവാദം വാങ്ങാന്‍ ത്രേസ്യാ അപ്പച്ചന്റെകൂടെ റോമയില്‍ പോയി 13-ാം ലെയോ മാര്‍പ്പാപ്പായോട് അഭ്യര്‍ത്ഥിച്ചു. ദൈവം തിരുമനസ്സാകുന്നെങ്കില്‍ കാര്യം നടക്കുമെന്നായിരുന്നു സമര്‍ത്ഥനായ മാര്‍പ്പാപ്പായുടെ മറുപടിയെങ്കിലും കാര്യം നടന്നു. 1889 ജനുവരി 10-ാം തീയതി സഭാവസ്ത്രം സ്വീകരിച്ചു; അടുത്തവര്‍ഷം സെപ്തംബര്‍ 8-ാം തീയതി പ്രഥമ വ്രതവാഗ് ദാനം ചെയ്തു. അപ്പോഴേക്കു പിതാവ് തളര്‍വാതരോഗിയായി കായേന്‍ ആശുപതിയില്‍ കിടപ്പായി. 1893 മുതല്‍ ഏതാനും കാലം നവസന്യാസിനീഗുരുവായി ജോലി ചെയ്തിട്ടുണ്ടങ്കിലും 24 വര്‍ഷത്തേക്കുമാത്രം നീണ്ടുനിന്ന ആ ജീവിതത്തിന്റെ അവസാനഭാഗം ക്ഷയരോഗത്തില്‍ കഴിഞ്ഞു.”ദൈവമേ, ഞാന്‍ അങ്ങയെ സ്‌നേഹിക്കുന്നു,” എന്നു പറഞ്ഞ് 1897 സെപ്തം ബര്‍ 30-ാം തീയതി ചെറുപുഷ്പം അടര്‍ന്നുവീണു. സ്വര്‍ഗ്ഗത്തില്‍നിന്ന് ഞാന്‍ റോസാപുഷ്പങ്ങള്‍ വര്‍ഷിക്കുമെന്ന വിശുദ്ധയുടെ വാഗ്ദാനം ഇന്നും നിറവേറിക്കൊണ്ടിരിക്കയാണ്. ഒരാഗോള മിഷനറിയാകാന്‍ ആഗ്രഹിച്ച ത്രേസ്യായെ 1928-ല്‍ 11-ാം പിയൂസു മാര്‍പ്പാപ്പാ വേദപ്രചാര മധ്യസ്ഥയായി പ്രഖ്യാപിച്ചപ്പോള്‍ അവളുടെ അഭീഷ്ടം നിറവേറി.

മരിക്കുന്നതിനുമുമ്പ് തന്റെ ജ്യേഷ്ഠ സഹോദരിമാരുടേയും മഠാധിപയായ ഗൊണ്‍സാഗാമ്മയുടേയും ആജ്ഞാനുസാരം സ്വന്തം ജീവചരിത്രമെഴുതി. ത്രേസ്യായുടെ ആദ്ധ്യാത്മിക ശിശുത്വവും സമ്പൂര്‍ണ്ണ ആത്മസമര്‍പ്പണവും കുറക്കുവഴിയും ആ സുന്ദരഗ്രന്ഥത്തിന്റെ താളുകളില്‍ സുലളിതമായ ഫ്രഞ്ചുഭാഷയില്‍ എഴുതിയിരിക്കുന്നു. ആ സ്വയംകൃതചരിതവും വിശുദ്ധ എഴുതിയ കത്തുകളുടെ സമാഹാരമായ നവമാലികാ സഖിയും ആദ്ധ്യാത്മിക ഗ്രന്ഥങ്ങളില്‍ അതിശ്രേഷ്ഠമായ സ്ഥാനം പിടിച്ചെടുത്തിട്ടുണ്ട്. 1925 മേയ് 17 ന് വിശുദ്ധയുടെ ചരമത്തിന്റെ 28-ാം വര്‍ഷം 11-ാം പീയൂസു മാര്‍പ്പാപ്പാ ചെറുപുഷ്പത്തെ എടുത്തു ബലിപീഠത്തില്‍ സ്ഥാപിച്ചു.

സ്റ്റാറ്റസ് വീഡിയോ ഡൗണ്‍ലോഡ് ചെയ്യൂ:

https://malabarvisiononline.com/wp-content/uploads/2024/09/Satuse-Video.mp4

ദൈവത്തിന്റെ അശരീരിയായ സന്ദേശവാഹകരാണു മാലാഖമാര്‍. മനുഷ്യരെ സൃഷ്ടിക്കുന്നതിനുമുമ്പുതന്നെ അവരെ സൃഷ്ടിച്ചുവെന്നു വിശുദ്ധ ഗ്രന്ഥത്തില്‍നിന്ന് വ്യക്തമാണ്. മനുഷ്യരുടെ മുഖഛായ വ്യത്യസ്തമായിരിക്കുന്നതുപോലെ മാലാഖമാര്‍ക്കു ശക്തി വ്യത്യസ്തമാണ്. അവരുടെ ശക്തിയനുസരിച്ചു മൂന്നു വൃന്ദങ്ങള്‍ ഉള്‍പ്പെടുന്ന മൂന്നു ഹയറാര്‍ക്കികള്‍ ഉള്ളതായി പറയുന്നു. പരിപൂര്‍ണ്ണതയുടെ ക്രമത്തില്‍
അവ താഴെ ചേര്‍ക്കുന്നു:

1. സ്രാപ്പന്മാര്‍, കെരൂബുകള്‍, സിംഹാസനങ്ങള്‍ 2. ഭക്തി ജ്വാലകന്മാര്‍, ശക്തികള്‍, ബലവത്തുക്കള്‍ 3. പ്രധാനികള്‍, റേശു മാലാഖമാര്‍, മാലാഖമാര്‍.

വിശുദ്ധ ഗ്രന്ഥത്തില്‍ ആകെ മൂന്നു റേശു മാലാഖമാരുടെ പേരുകള്‍ മാത്രമേ രേഖപ്പെടുത്തിയിട്ടുള്ളൂ. അവരുടെ മൂന്നു പേരുടേയും തിരുനാള്‍ ആധുനിക പഞ്ചാംഗമനുസരിച്ച്-ഇന്നാണ്.

193-ല്‍ അപ്പുളിയായില്‍ വിശുദ്ധ മിഖായേല്‍ മാലാഖയുടെ തിരുനാള്‍ കൊണ്ടാടിയിരുന്നതായി രേഖകളുണ്ട്. റോമായിലെ വിശുദ്ധ മിഖായേലിന്റെ നാമത്തിലുള്ള ദേവാലയ പ്രതിഷ്ഠ 610 സെപ്തംബര്‍ 29-ന് ആയിരുന്നു.

വെളിപാടിന്റെ പുസ്തകം 12-ാം അധ്യായത്തില്‍ ലൂസിഫര്‍ പ്രഭതികളെ മിഖായേലും സഹദൂതന്മാരും കൂടി തോല്പിച്ചുവെന്നു കാണുന്നുണ്ട്. അതിനാല്‍ മിഖായേല്‍ മാലാഖ സഭാസംരക്ഷകനാണ്. ഗ്രീക്കുപിതാക്കന്മാര്‍ മിഖായേലിനെ റേശു മാലാഖമാരുടെ വൃന്ദത്തിലല്ല ചേര്‍ക്കുന്നതു. പ്രത്യുത സാപ്പേ മാലാഖമാരുടെ തലവനായിട്ടാണ്.

ദാനിയേലിന്റെ പുസ്തകം പത്തും പന്ത്രണ്ടും അധ്യായങ്ങളിലും യൂദായുടെ ലേഖനത്തിലും മിഖായേല്‍ മാലാഖ അനുസ്മരിക്കപ്പെടുന്നു. പൈശാചികാക്രമണങ്ങളില്‍ മിഖായേല്‍ മാലാഖയോടുള്ള പ്രാര്‍ത്ഥന എത്രയും ഫലവ ത്താണ്. ‘മി-കാബഎല്‍’ ദൈവത്തെപ്പോലെ ആരുണ്ട്? എന്നാണ് ഈ മാലാഖ വിളിച്ചു പറഞ്ഞത്. അതുതന്നെ മാലാഖയുടെ നാമധേയമായി.

ദൈവത്തിന്റെ ശക്തന്‍ എന്നാണു ഗബ്രിയേല്‍ എന്ന പദത്തിന്റെ വാച്യാര്‍ത്ഥം. അദ്ദേഹത്തിന്റെ പേരു വിശുദ്ധ ഗ്രന്ഥത്തില്‍ നാലുപ്രാവശ്യം കാണുന്നു. അലക്‌സാണ്ടര്‍ ചക്രവര്‍ത്തി പേര്‍ഷ്യന്‍ സാമ്രാജ്യത്തെ ആക്രമിച്ചു നശിപ്പിച്ചതും ചക്രവര്‍ത്തിയുടെ മരണശേഷം സൈനികര്‍ ഭാഗിച്ചെടുക്കുന്നതും ഗബ്രിയേല്‍ ദാനിയേല്‍ പ്രവാചകനു വിവരിച്ചുകൊടുക്കുന്നു (ദാനി 8). രക്ഷകന്റെ ജനനകാലം അതേ പ്രവാചകനെ അറിയി ക്കുന്നു (ദാനി 9). സ്‌നാപകന്റെ ജനനം സക്കറിയാസിനേയും രക്ഷകന്റെ അവതാരം മറിയത്തേയും മുന്‍കൂട്ടി അറിയിക്കുന്നു (ലൂക്കാ 1). യഹൂദന്മാര്‍ ഗബ്രിയേലിനെ വിധിയുടെ മാലാഖയായി അനുസ്മരിക്കുന്നു. മിഖായേല്‍ കഴിഞ്ഞാല്‍ അവരുടെ ദൃഷ്ടിയില്‍ ഒന്നാംസ്ഥാനം ഗ്രബ്രിയേലിനാണ്. ക്രിസ്തീയ പാരമ്പര്യമനുസരിച്ച് വിശുദ്ധ യൗസേപ്പിന്റെ സംശയങ്ങള്‍ക്കു നിവാരണം നല്കിയതും ഗത്സമെനില്‍ കര്‍ത്താവിനെ ആശ്വസിപ്പിച്ചതും ഈ മാലാഖയാണ്. തപാല്‍ ഉദ്യോഗസ്ഥന്മാരുടെ മധ്യസ്ഥനാണു വിശുദ്ധ ഗബ്രിയേല്‍.

ദൈവം സുഖപ്പെടുത്തി എന്നാണു റാഫേല്‍ സംജ്ഞയുടെ വാച്യാര്‍ത്ഥം. ഗാബേലിനു തോബിയാസ് കടംകൊടുത്തിരുന്ന സംഖ്യ വാങ്ങിക്കാന്‍ കൊച്ചു തോബിയാസിനെ അയച്ചപ്പോള്‍ സഹയാത്രികനായി ദൈവം അയച്ചുകൊടുത്ത മാലാഖ റാഫേലാണ്. അദ്ദേഹംതന്നെ ഇങ്ങനെ പ്രഖ്യാപിക്കുകയുണ്ടായി: ”കര്‍ത്താവിന്റെ മുമ്പില്‍ നില്ക്കുന്ന ഏഴ് മാലാഖമാരില്‍ ഒരാ ളായ റാഫേലാണു ഞാന്‍” (തോബി 12: 15). വെളിപാടിന്റെ പുസ്തകം 8-ാം അധ്യായം ചേര്‍ത്തുവായിക്കുമ്പോള്‍ ഈ ഏഴുപേരില്‍ റേശുമാലാഖമാര്‍ മൂന്നുപേരും ഉള്‍പ്പെടുന്നുണ്ടെന്നു കാണാം. അതിനാല്‍ റാഫേല്‍ റേശുമാലാഖ മാത്രമല്ല സ്രാപ്പേയാണ്. ബെത്ത് സെയിദായിലേ കുളത്തില്‍ ഇടക്കിടയ്ക്ക് ഇറങ്ങി രോഗികളെ സുഖപ്പെടുത്തിയിരുന്നതു റാഫേലാണന്നാണു പാരമ്പര്യം (യോഹ 5: 4).