പൗലോസ് ശ്ലീഹായുടെ ശിഷ്യനായ തിമോത്തി ഏഷ്യാ മൈനറില്‍ ലിസ്ത്രം എന്ന പ്രദേശത്തു ജനിച്ചു. അമ്മ ഒരു യഹൂദ സ്ത്രീയും അച്ഛന്‍ ഒരു വിജാതിയനുമായിരുന്നു. പൗലോസ് ശ്ലീഹാ ലിസ്ത്രായില്‍ ആദ്യം ചെന്നപ്പോള്‍ത്തന്നെ യുവാവായിരുന്ന തിമോത്തിയും അമ്മയും അമ്മാമ്മയും ക്രിസ്തീയ വിശ്വാസം സ്വീകരിച്ചു.
ഏഴുവര്‍ഷം കഴിഞ്ഞ് പൗലോസ് വീണ്ടും ലിസ്ത്രാ സന്ദര്‍ശിച്ചപ്പോള്‍ തിമോത്തി തപോവിഷ്ഠനും സല്‍സ്വഭാവിയുമായി ജീവിക്കുന്നുവെന്ന് മനസിലാക്കി. അദ്ദേഹം തിമോത്തിക്ക് പുരോഹിത സ്ഥാനത്തിനുള്ള കൈവെപ്പു നല്‍കി. അന്നുമുതല്‍ അദ്ദേഹം പൗലോസിന്റെ ഒരു സഹചാരിയും വിശ്വസ്തനുമായി.
ശ്ലീഹാ തിമോത്തിക്ക് നല്‍കിയ ഉപദേശങ്ങളില്‍ ഏറ്റവും പ്രധാനമായത് വിശുദ്ധ ഗ്രന്ഥം വായിക്കുക എന്നതാണ്. അത് ദൈവനിവേശിതമാകയാല്‍ അവരെ പഠിപ്പിക്കാന്‍ എത്രയും ഉപകാരപ്രദമായിരിക്കുമെന്ന് അപ്പസ്‌തോലന്‍ തിമോത്തിയെ ധരിപ്പിച്ചു. 97-ാം ആണ്ടില്‍ തിമോത്തി രക്തസാക്ഷിത്വമകുടം ചൂടി.