ദേവാലയ ശുശ്രൂഷകര്‍ ഇടവകയെ ആത്മീയതയില്‍ നയിക്കുന്നതിനുവേണ്ടി അത്യദ്ധ്വാനം ചെയ്യുന്നവരാണെന്ന് താമരശ്ശേരി രൂപത ബിഷപ് മാര്‍ റെമീജിയോസ് ഇഞ്ചനാനിയില്‍. താമരശ്ശേരി രൂപതയിലെ ദേവാലയ ശുശ്രൂഷകരുടെ സംഗമം ഉദ്ഘാടനം ചെയ്തു പ്രസംഗിക്കുകയായിരുന്നു ബിഷപ്. ഇടവകയിലെ എല്ലാവരെയും പരിചിതമായതിനാല്‍ത്തന്നെ ആത്മീയത പകര്‍ന്നു നല്‍കുവാന്‍ ദേവാലയ ശുശ്രൂഷികള്‍ക്ക് എളുപ്പമാണെന്നും അതിനായി എല്ലാവരും പരിശ്രമിക്കണമെന്നും ബിഷപ് ആഹ്വാനം ചെയ്തു.
മതബോധന ഡയറക്ടര്‍ ഫാ. ജോണ്‍ പള്ളിയ്ക്കാവയലില്‍ മുഖ്യപ്രഭാഷണം നടത്തി. ദൈവാലയ ശുശ്രൂഷകരുടെ സേവനമഹിമയെയും പ്രാധാന്യത്തെയും കുറിച്ച് അദ്ദേഹം വിശദീകരിച്ചു.
വികാരി ജനറല്‍ മോണ്‍. അബ്രഹാം വയലില്‍, ഫിനാന്‍സ് മാനേജര്‍ ഫാ. കുര്യാക്കോസ് മുഖാല, ഫാ. ജോര്‍ജ്ജ് പുരയിടത്തില്‍ എന്നിവര്‍ പ്രസംഗിച്ചു.