കാലിക്കറ്റ് യൂണിവേഴ്‌സിറ്റിയുടെ ചെയര്‍ ഫോര്‍ ക്രിസ്ത്യന്‍ സ്റ്റഡീസ് ആന്റ് റിസേര്‍ച്ച് ഗവേണിങ് ബോഡി അംഗമായി തെരഞ്ഞെടുക്കപ്പെട്ട ഫാ. സ്‌കറിയ മങ്ങര, മികച്ച ആനിമേഷന്‍ ചിത്രത്തിനുള്ള ദേശീയ അവാര്‍ഡ് ജേതാവ് ജോഷി ബെനഡിക്ട്, കാലിക്കറ്റ് യൂണിവേഴ്‌സിറ്റി സിന്‍ഡിക്കേറ്റ് അംഗമായി തെരഞ്ഞെടുക്കപ്പെട്ട ടി. ജെ. മാര്‍ട്ടിന്‍ തച്ചില്‍ എന്നിവര്‍ക്ക് താമരശ്ശേരി രൂപതയുടെ ആദരം. 12-ാമത് പാസ്റ്ററല്‍ കൗണ്‍സിലിന്റെ മൂന്നാമത് സമ്മേളനത്തിലാണ് ബിഷപ് മാര്‍ റെമീജിയോസ് ഇഞ്ചനാനിയില്‍ ഇവരെ ആദരിച്ചത്.
താമരശ്ശേരി രൂപതാ വൈദികനും തിരുവമ്പാടി അല്‍ഫോന്‍സാ കോളജ് മാനേജറുമായ ഫാ. സ്‌കറിയ മങ്ങരയില്‍ കൂടരഞ്ഞി ഇടവകാംഗമാണ്. 2017 മുതല്‍ അല്‍ഫോന്‍സാ കോളജ് മാനേജരായി സേവനം ചെയ്യുന്നു. വേനപ്പാറ ഇടവക വികാരിയും കാലിക്കറ്റ് യൂണിവേഴ്‌സിറ്റി സെനറ്റ് അംഗവുമാണ്.
പുല്ലൂരാംപാറ ഇടവകാംഗമായ ജോഷി ബെനഡിക്ട് സംവിധാനം ചെയ്ത ‘എ കോക്കനട്ട് ട്രീ’ എന്ന ചിത്രത്തിനാണ് നോണ്‍ ഫീച്ചര്‍ വിഭാഗത്തില്‍ മികച്ച ആനിമേഷന്‍ ചിത്രത്തിനുള്ള ദേശീയ പുരസ്‌ക്കാരം ലഭിച്ചത്.
കാലിക്കറ്റ് യൂണിവേഴ്‌സിറ്റി സിന്‍ഡിക്കേറ്റ് അംഗമായി തെരഞ്ഞെടുക്കപ്പെട്ട ടി. ജെ. മാര്‍ട്ടിന്‍ തച്ചില്‍ മലപ്പുറം ഫൊറോന ഇടവകാംഗമാണ്. കാലിക്കറ്റ് യൂണിവേഴ്‌സിറ്റി മുന്‍ അസി. രജിസ്ട്രാറായിരുന്ന ടി. ജെ. മാര്‍ട്ടിന്‍ താമരശ്ശേരി രൂപത പാസ്റ്റര്‍ കൗണ്‍സില്‍ അംഗമാണ്.
