മാര്ട്ടിന് ജനിച്ചത് 316-ല്‍ ഇന്നത്തെ ഹങ്കറിയിലാണ്. മാതാപിതാക്കന്മാര്‍ അവനെ ശിശുപ്രായത്തില്‍ തന്നെ ഇറ്റലിയില്‍ പാവിയായിലേക്കു കൂട്ടിക്കൊണ്ടുപോയി. അവിടെയായിരുന്നു അവന്റെ വിദ്യാഭ്യാസം. പിതാവ് ഒരു സൈനികോദ്യോഗസ്ഥനായിരുന്നു. ബാലന്‍ പത്താമത്തെ വയസ്സു മുതല്‍ മാതാപിതാക്കന്മാരുടെ ഇഷ്ടത്തിന് വിരുദ്ധമായി അടുത്ത പള്ളിയില്‍ പോയി മതപഠനം നടത്തിവന്നിരുന്നു. പതിനഞ്ചാമത്തെ വയസ്സില്‍ പിതാവിന്റെ നിര്‍ബന്ധപ്രകാരം അവന്‍ സൈന്യത്തില്‍ ചേര്‍ന്നെങ്കിലും സൈനികരുടെ തിന്മകള്‍ക്ക് അവന്‍ വിധേയനായില്ല.
മാര്‍ട്ടിന്റെ അനുകമ്പയേയും ഉപവിയേയും സംബന്ധിച്ച് വിശുദ്ധ സള്‍പീസിയൂസു വിവരിച്ചിരിക്കുന്ന ഒരു സംഭവം പ്രസിദ്ധമാണ്. മഞ്ഞുകാലത്ത് ആമീന്‍സു നഗരത്തില്‍ തണുത്തു വിറയ്ക്കുന്ന ഒരു ഭിക്ഷുവിനെ കണ്ട് അനുകമ്പ തോന്നി തന്റെ മേലങ്കി വാളുകൊണ്ട് രണ്ടായി മുറിച്ച് ഒരു കഷണം ആ ഭിക്ഷുവിനു കൊടുത്തു. കൂട്ടുകാര്‍ മാര്‍ട്ടിന്റെ പ്രവൃത്തി കണ്ട് അവനെ പരിഹസിച്ചു. അന്നു രാതി മാര്ട്ടിന് താന്‍ ഭിക്ഷുവിനുകൊടുത്ത വസ്ത്രക്കഷണം അണിഞ്ഞിരുന്ന യേശു ക്രിസ്തുവിനെ നിദ്രയില്‍ കണ്ടു. ഒരു നവശിഷ്യനായ മാര്ട്ടിന് നല്കിയതാണ് ഈ വസ്ത്രമെന്ന് ഈശോ പറയുന്നത് മാര്ട്ടിന് ശ്രവിച്ചു. ഈ കാഴ്ച ജ്ഞാനസ്‌നാനം ഉടനടി സ്വീകരിക്കാന്‍ മാര്ട്ടിന് പ്രേരണ നല്കി. 18-ാമത്തെ വയസ്സില്‍ മാര്ട്ടിന് ജ്ഞാനസ്‌നാനപ്പെട്ടു. താമസിയാതെ സൈന്യത്തില്‍ നിന്ന് രാജിവച്ചു പോയിറ്റിയേഴ്സിലെ ഹിലരിയോടുകൂടെ താമസിച്ചു. അവിടെ അടുത്ത് മാര്ട്ടിന് ഒരാശ്രമം നിര്‍മിച്ചു.
56-ാമത്തെ വയസ്സില്‍ മാര്ട്ടിന് ടൂഴ്സിലെ മെത്രാനായി. രൂപതാംഗങ്ങള്‍ പേരിന് ക്രിസ്ത്യാനികളായിരുന്നുവെങ്കിലും ഹൃദയം വിജാതീയമായിരുന്നു. നിരായുധനായി ഏതാനും സന്യാസികളോടുകൂടെ വിജാതീയ ക്ഷേത്രങ്ങളും കാവുകളും അദ്ദേഹം നശിപ്പിച്ചു. വിനീതമായ അദ്ധ്വാനത്താല്‍ തന്റെ പാപങ്ങള്‍ക്ക് പരിഹാരം ചെയ്യാന്‍ അദ്ദേഹം ശ്രമിച്ചുകൊണ്ടിരുന്നപ്പോള്‍ ദൈവം അത്ഭുതങ്ങള്‍ വഴി അദ്ദേഹത്തിന്റെ വിശുദ്ധി പ്രകാശിതമാക്കി. പ്രസംഗങ്ങളും അത്ഭുതങ്ങളും വഴി ജനങ്ങളെ അദ്ദേഹം മനസ്സുതിരിച്ചു. പാഷണ്ഡികളെ വധിക്കുന്ന സമ്പ്രദായം വിശുദ്ധ അംബ്രോസിനെപ്പോലെ മാര്‍ട്ടിനും എതിര്‍ത്തു. തന്നിമിത്തം അദ്ദേഹം വളരെ കഷ്ടപ്പെടേണ്ടി വന്നിട്ടുണ്ട്.
പനിപിടിച്ചാണ് മാര്ട്ടിന് മരിച്ചത്. ആ പനിയുടെ ഇടയ്ക്കും അദ്ദേഹം രാത്രി പ്രാര്‍ത്ഥിച്ചിരുന്നു. ചാരത്തിലാണ് കിടന്നിരുന്നത്. ഒരു ക്രിസ്ത്യാനി ചാരത്തില്‍ കിടന്നു മരിക്കണമെന്നാണ് അദ്ദേഹം പറഞ്ഞിരുന്നത്. 397 നവംബര്‍ 8-ാം തീയതി മാര്ട്ടിന് നിര്യാതനായി.
