താമരശ്ശേരി രൂപതയുടെ സ്വര്‍ഗീയ മധ്യസ്ഥയായ വിശുദ്ധ അല്‍ഫോന്‍സാമ്മയുടെ തിരുനാളിനോടനുബന്ധിച്ച് ഭരണങ്ങാനത്തേക്കുള്ള രൂപതാതല തീര്‍ത്ഥാടനം ജൂലൈ 23-ന് നടക്കുമെന്ന് ബിഷപ് മാര്‍ റെമീജിയോസ് ഇഞ്ചനാനിയില്‍ സര്‍ക്കുലറിലൂടെ അറിയിച്ചു.
അല്‍ഫോന്‍സാമ്മയിലൂടെ കഴിഞ്ഞ 38 വര്‍ഷങ്ങളിലായി രൂപതാ കുടുംബത്തിനു ലഭിച്ച അനുഗ്രഹങ്ങള്‍ക്ക് നന്ദി പറയാനുള്ള അവസരമാണ് ഭരണങ്ങാനം തീര്‍ത്ഥാടനമെന്നും ഇടവകകളോ, വിവിധ ഇടവകകള്‍ ചേര്‍ന്നോ വാഹന സൗകര്യമൊരുക്കിയാല്‍ തീര്‍ത്ഥാടകര്‍ക്ക് ഉപകാരപ്രദമാകുമെന്നും സര്‍ക്കുലറില്‍ പറയുന്നു.
തീര്‍ത്ഥാടന കേന്ദ്രത്തിലെ പ്രാര്‍ത്ഥനയ്ക്കും അനുബന്ധ ശുശ്രൂഷകള്‍ക്കും ജൂലൈ 23-ന് നേതൃത്വം നല്‍കുന്നത് താമരശ്ശേരി രൂപതയാണ്. രാവിലെ 11-ന് വിശുദ്ധ കുര്‍ബാനയും അനുബന്ധ ശുശ്രൂഷകളും ക്രമീകരിച്ചിട്ടുണ്ട്.
തീര്‍ത്ഥാടന ദേവാലയത്തിന്റെ നവീകരണവും മോടിപിടിപ്പിക്കലും അവസാന ഘട്ടത്തിലാണ്. ജൂലൈ 19 മുതല്‍ 28 വരെയാണ് തിരുനാള്‍. 19-ന് രാവിലെ 11.15-ന് മാര്‍ ജോസഫ് കല്ലറങ്ങാട്ട് തിരുനാളിന് കൊടിയേറ്റും. പ്രധാന തിരുനാള്‍ ദിനമായ 28-ന് പുലര്‍ച്ചെ 4.45 മുതല്‍ രാത്രി 9.30 വരെ ഓരോ മണിക്കൂറിലും വിശുദ്ധ കുര്‍ബാനയുണ്ടായിരിക്കും.