ഡിസംബര്‍ 17: വിശുദ്ധ ഒളിമ്പിയാസ്
പൗരസ്ത്യ സഭയിലെ വിധവകളുടെ കീര്‍ത്തനമാണ് വിശുദ്ധ ഒളിമ്പിയാസ്. സമ്പത്തും കുലീനത്വവും ചേര്‍ന്ന ഒരു കുടുംബത്തില്‍ 368ല്‍ ജനിച്ചു. മാതാപിതാക്കളുടെ മരണശേഷം പിതൃസഹോദരന്റെ സംരക്ഷണത്തില്‍ അവള്‍ വളര്‍ന്നുവന്നു. ചെറുപ്പത്തില്‍ തന്നെ വിവാഹം കഴിച്ചുവെങ്കിലും ഇരുപതാം ദിവസം ഭര്‍ത്താവ് ഈ ലോകവാസം വെടിഞ്ഞു. പുനര്‍വിവാഹത്തിന് പലരും അവളെ പ്രേരിപ്പിച്ചു എങ്കിലും അവള്‍ സമ്മതിച്ചില്ല. പ്രാര്‍ത്ഥനയിലും പ്രായശ്ചിത്തത്തിലും അവള്‍ ദിവസങ്ങള്‍ കഴിച്ചുകൂട്ടി. മൃദുലമായ അവളുടെ ശരീരത്തെ ഉപവാസം കൊണ്ട് മര്‍ദ്ദിച്ചു. എളിമയും ശാന്തതയും വഴി അവള്‍ സ്വന്തം ഇഷ്ടത്തെ ക്രൂശിക്കുകയും ചെയ്തു. തന്റെ ഓഹരി തിരുസഭയ്ക്കും ദരിദ്രര്‍ക്കുമായി അവള്‍ ഭാഗിച്ചുകൊടുത്തു. വിശുദ്ധ ക്രിസോസ്റ്റമായിരുന്നു ഒളിമ്പിയാസിന്റെ ജ്ഞാനപിതാവ്. 404 ജൂണ്‍ 20ന് വിശുദ്ധന്‍ നാടുകടത്തപ്പെട്ടപ്പോള്‍ ഒളിമ്പിയാസിന് ഉപദേഷ്ടാവ് ഇല്ലാതായി. അതോടെ അവള്‍ക്ക് പീഢനങ്ങള്‍ വര്‍ദ്ധിച്ചു. അവളുടെ സ്വത്തുവകകള്‍ അന്യായമായി ലേലം വിളിച്ചുവിറ്റു. അവള്‍ സ്ഥാപിച്ച മഠത്തിലെ കന്യാസ്ത്രീകളെയും അവളെയും മഠത്തില്‍ നിന്നും ഇറക്കിവിട്ടു. ഈ കഷ്ടതകളെല്ലാം ആവലാതി കൂടാതെ സഹിച്ച് 420 ല്‍ 42-ാമത്തെ വയസില്‍ ഒളിമ്പിയാസ് നിര്യാതയായി.
