മുനമ്പം: കത്തോലിക്കാ കോണ്‍ഗ്രസ് ഐക്യദാര്‍ഢ്യ-പ്രതിഷേധ ദിനം നവംബര്‍ 10ന്
വഖഫ് കുടിയിറക്ക് ഭീഷണി നേരിടുന്ന മുനമ്പം ജനതയ്ക്ക് ഐക്യദാര്‍ഢ്യം പ്രഖ്യാപിച്ച് കത്തോലിക്കാ കോണ്‍ഗ്രസ് താമരശ്ശേരി രൂപതയിലെ മുഴുവന്‍ യൂണിറ്റ് കേന്ദ്രങ്ങളിലും നവംബര്‍ 10-ന് ഐക്യദാര്‍ഢ്യ-പ്രതിഷേധ ദിനമായി ആചരിക്കും.
ഭാരതത്തിന്റെ ഭരണാഘടനയെയും ജനാധിപത്യത്തിന്റെ നെടുംതൂണുകളായ നിയമനിര്‍മാണ സഭകളെയും നീതിന്യായ വ്യവസ്ഥിതിയെയും കാര്യനിര്‍വഹണ സംവിധാനങ്ങളെയും പൗരന്റെ മൗലീകവകാശങ്ങളെയും നോക്കുകുത്തിയായിനിര്‍ത്തുന്ന വഖഫ് കാടന്‍ നിയമം മൂലം നീതി നിഷേധിക്കപ്പെടുന്ന മുനമ്പം ജനതയുടെ ഭൂസ്വത്തിലും ജീവനോപാദികളിലും വഖഫ് അവകാശവാദം അവസാനിപ്പിക്കുക, വഖഫ് നിയമ ഭേദഗതി മുന്‍കാല പ്രാബല്യത്തോടെ നടപ്പില്‍ വരുത്തുക, ബില്ലിനെതിരെ കേരള നിയമസഭ പാസാക്കിയ പ്രമേയം പിന്‍വലിക്കുക, ഇരകളെ നീക്കിനിര്‍ത്തിയുള്ള കപട പ്രശ്‌നപരിഹാരചര്‍ച്ചകള്‍ ഒഴിവാക്കുക, മുനമ്പം ഭൂമി വഖഫ് അല്ല എന്ന സത്യം നിയമസഭ പ്രഖ്യാപിക്കുക, വഖഫിന്റെ മറവില്‍ വഖഫ് അല്ലാത്ത ഭൂമിക്ക് പകരം സര്‍ക്കാര്‍ ഭൂമിനല്‍കാനുള്ള രാഷ്ട്രീയപ്രീണനവും കാപട്യവും അവസാനിപ്പിക്കുക, പാര്‍ട്ടികളുടെയും നേതാക്കന്മാരുടെയും ഇരട്ടത്താപ്പ് അവസാനിപ്പിക്കുക എന്നീ ആവശ്യങ്ങള്‍ ഉന്നയിച്ചു കൊണ്ടാണ് ഐക്യദാര്‍ഢ്യ ദിനം ആചരിക്കുന്നതെന്ന് കത്തോലിക്കാ കോണ്‍ഗ്രസ് താമരശ്ശേരി രൂപത പ്രസിഡന്റ് ഡോ. ചാക്കോ കാളം പറമ്പില്‍, ഡയറക്ടര്‍ ഫാ. സബിന്‍ തൂമുള്ളില്‍, ജനറല്‍ സെക്രട്ടറി ഷാജി കണ്ടത്തില്‍, ട്രഷറര്‍ സജി കരോട്ട് എന്നിവര്‍ അറിയിച്ചു.
നവംബര്‍ 10-ന് കത്തോലിക്കാ കോണ്‍ഗ്രസ് യൂണിറ്റ് കേന്ദ്രങ്ങളില്‍ പ്രതിഷേധ യോഗങ്ങളും റാലികളും നടത്തും.
