ജൂലൈ 19: വിശുദ്ധ യുസ്തായും റുഫീനായും
സ്‌പെയിനിലെ സെവീലില്‍ മണ്‍പാത്രങ്ങള്‍ നിര്‍മിച്ചു വിറ്റ് ഉപജീവനം നടത്തിയിരുന്ന രണ്ടു ക്രിസ്തീയ വനിതകളാണ് യുസ്തായും റുഫിനായും. വിജാതീയ പൂജകള്‍ക്ക് ഉപയോഗിക്കുവാനുള്ള പാത്രങ്ങള്‍ അവര്‍ ആര്‍ക്കും വിറ്റിരുന്നില്ല. കുപിതരായ വിജാതീയര്‍ ആ വനിതകള്‍ വില്ക്കാന്‍ വച്ചിരുന്ന പാത്രങ്ങളെല്ലാം ഉടച്ചുകളഞ്ഞു. ഇതിന് പ്രതികാരമായി ഒരു ദേവിയുടെ വിഗ്രഹം അവര്‍ തകര്‍ത്തു. വിജാതീയര്‍ രോഷം പൂണ്ട് ഗവര്‍ണരോട് ആവലാതിപ്പെട്ടു.
പ്രീഫെക്ട് യുസ്തായോടും റുഫിനായോടും അവര്‍ നശിപ്പിച്ച വിഗ്രഹങ്ങള്‍ ഏതു ദേവന്മാരുടെയാണോ ആ ദേവന്മാര്‍ക്ക് ബലി അര്‍പ്പിക്കാന്‍ ആജ്ഞാപിച്ചു. അവര്‍ അതിന് സന്നദ്ധരായില്ലെന്ന് മാത്രമല്ല തങ്ങളുടെ ഗുരു യേശുക്രിസ്തുവാണെന്ന് ഏറ്റുപറയുകയും ചെയ്തു. ഉടനടി അവരെ പീഡന യന്ത്രത്തില്‍ കിടത്തി പീഡിപ്പിക്കാനും ഉദരം മുള്ളുകള്‍കൊണ്ട് കീറാനും പ്രീഫെക്ട് ഉത്തരവിട്ടു.
ബലി അര്‍പ്പിക്കാന്‍ സന്നദ്ധരാകയാണെങ്കില്‍ മോചിക്കാന്‍ വേണ്ടി ഒരു വിഗ്രഹം പീഡനോപകരണത്തിന്റെ അരികെ വച്ചിരുന്നു. ഈ മര്‍ദ്ദനങ്ങള്‍ കൊണ്ടൊന്നും അവരുടെ വിശ്വാസം ചഞ്ചലിച്ചില്ല. യുസ്താ പീഡനയന്ത്രത്തില്‍ കിടന്ന് മരിച്ചു. റുഫിനായുടെ കഴുത്തു ഞെക്കിക്കൊല്ലാനും രണ്ടുപേരുടെ ശരീരം ദഹിപ്പിക്കാനും പ്രീഫെക്ട് ആജ്ഞ നല്കി.
