കിടപ്പാടം സംരക്ഷിക്കുന്നതിനും വഖഫ് നിയമത്തിന്റെ മറവില്‍ കുടിയിറക്കാനുള്ള ഗൂഢനീക്കം തടയുന്നതിനുമായി സമരമുഖത്തുള്ള മുനമ്പം നിവാസികള്‍ക്ക് ഉടന്‍ നീതി ഉറപ്പാക്കണമെന്ന് ബിഷപ് മാര്‍ റെമീജിയോസ് ഇഞ്ചനാനിയിലിന്റെ അധ്യക്ഷതയില്‍ ചേര്‍ന്ന താമരശ്ശേരി രൂപതാ പാസ്റ്റര്‍ കൗണ്‍സില്‍ യോഗം സംസ്ഥാന സര്‍ക്കാരിനോടും വഖഫ് അധികൃതരോടും ആവശ്യപ്പെട്ടു.
പതിറ്റാണ്ടുകള്‍ക്ക് മുമ്പ് ഉടമകള്‍ക്ക് വില നല്‍കി തീറാധാരം രജിസ്റ്റര്‍ ചെയ്ത് നികുതിയടച്ച് ക്രയവിക്രയ സ്വാതന്ത്ര്യത്തോടെ മുനമ്പം നിവാസികള്‍ കൈവശംവച്ചനുഭവിച്ചുവരുന്ന ഭൂമി അവരുടെ മാത്രം സ്വത്താണെന്നും അത് വഖഫിന്റേതാണെന്ന പ്രചാരണം വാസ്തവമല്ലെന്നും സംസ്ഥാന സര്‍ക്കാരും മന്ത്രിമാരും ഭരണ-പ്രതിപക്ഷ നേതാക്കന്മാരും രാഷ്ട്രീയരംഗത്തെ പ്രമുഖരും മുസ്ലിം സംഘടനകളും ഫാറൂഖ് കോളജ് അധികൃതരും പരസ്യമായി പ്രഖ്യാപിച്ചിട്ടും നീതി നടപ്പിലാക്കുന്നതില്‍ സര്‍ക്കാരും ബന്ധപ്പെട്ട അധികാരികളും പുലര്‍ത്തുന്ന നിസ്സംഗത അംഗീകരിക്കാനാവില്ലെന്ന് യോഗം ചൂണ്ടിക്കാട്ടി. ഇതുസംബന്ധിച്ച് ഡോ. ചാക്കോ കാളംപറമ്പില്‍ അവതരിപ്പിച്ച പ്രമേയം കൗണ്‍സില്‍ യോഗം ഏകകണ്ഠമായി അംഗീകരിച്ചു.
ചങ്ങനാശ്ശേരി അതിരൂപതാ പാസ്റ്ററര്‍ കൗണ്‍സില്‍ സെക്രട്ടറി ഡോ. രേഖ മാത്യൂസ് മുഖ്യപ്രഭാഷണം നടത്തി. ഫാ. ജോണ്‍ ഒറവുങ്കര, ഫാ. അഭിലാഷ് ചിലമ്പിക്കുന്നേല്‍, ഫാ. ബിനു കുളത്തിങ്കല്‍ എന്നിവര്‍ വിവിധ കര്‍മ്മപദ്ധതികളുടെ രൂപരേഖയും പാസ്റ്ററല്‍ കൗണ്‍സില്‍ സെക്രട്ടറി ബെന്നി ലൂക്കോസ് റിപ്പോര്‍ട്ടും അവതരിപ്പിച്ചു.
വയനാട്ടിലെയും വിലങ്ങാട്ടിലെയും ഉരുള്‍പൊട്ടല്‍ ബാധിതര്‍ക്ക് ഉചിതമായ പുനഃരധിവാസ പദ്ധതി ഉടന്‍ നടപ്പിലാക്കണമെന്ന് അഡ്വ. ബീന ജോസ് അവതരിപ്പിച്ച പ്രമേയത്തിലൂടെ യോഗം കേന്ദ്ര, സംസ്ഥാന സര്‍ക്കാരുകളോട് ആവശ്യപ്പെട്ടു.
ദേശീയ അവാര്‍ഡ് ജേതാവ് ജോഷി ബെനഡിക്ട്, ഫാ. സ്‌കറിയ മങ്കര, മാര്‍ട്ടിന്‍ തച്ചില്‍ എന്നിവരെ യോഗം ആദരിച്ചു.
ഫാ. ജോസ് പെണ്ണാപറമ്പില്‍ രചിച്ച ‘ടുവേഡ്‌സ് ദി ട്രൂത്ത്’ എന്ന ഗ്രന്ഥം ബിഷപ് പ്രകാശനം ചെയ്തു. രൂപതാതലത്തില്‍ മികച്ച കുടുംബയൂണിറ്റുകള്‍ക്ക് ട്രോഫിയും ക്യാഷ് അവാര്‍ഡും ബിഷപ് വിതരണം ചെയ്തു.
താമരശ്ശേരി രൂപതയുടെ റൂബി ജൂബിലി കര്‍മ്മപദ്ധതികളും മാര്‍പാപ്പ പ്രഖ്യാപിച്ച മഹാജൂബിലിയുടെ ഒരുക്കങ്ങളും യോഗം വിലയിരുത്തി.
വികാരി ജനറല്‍ മോണ്‍. അബ്രാഹം വയലില്‍, ചാന്‍സലര്‍ ഫാ. സെബാസ്റ്റ്യന്‍ കാവളക്കാട്ട് എന്നിവര്‍ പ്രസംഗിച്ചു. ഫാ. കുര്യാക്കോസ് മുഖാല, തോമസ് വലിയപറമ്പന്‍ എന്നിവര്‍ നേതൃത്വം നല്‍കി.
