നവംബര്‍ 4: വിശുദ്ധ ചാള്‍സ് ബൊറോമിയോ
1538 ഒക്ടോബര്‍ രണ്ടിന് മിലാനിലെ പ്രസിദ്ധമായ ബൊറോമിയാ കുടുംബത്തില്‍ ചാള്‍സ് ജനിച്ചു. പന്ത്രണ്ടു വയസ്സുള്ളപ്പോള്‍ത്തന്നെ ചാള്‍സ് പിതാവിനോടു പറഞ്ഞു തനിക്കുള്ള ആദായത്തില്‍നിന്ന് ചെലവുകഴിച്ച് ബാക്കി മുഴുവനും ദരിദ്രര്‍ക്കുള്ളതാണെന്ന്. തന്റെ അമ്മാവന്‍ കര്‍ദ്ദിനാള്‍ ദെമെദീച്ചി 1559-ല്‍ നാലാം പീയൂസ് മാര്‍പാപ്പായായി സ്ഥാനമേറ്റു. 1560 ഫെബ്രുവരിയില്‍ വെറും അല്‍മേനിയായിരുന്ന ചാള്‍സിനെ കര്‍ദ്ദിനാള്‍ ഡീക്കനായി നിയമിച്ചു. സാമര്‍ത്ഥ്യം പരിഗണിച്ച് അദ്ദേഹത്തിന് വത്തിക്കാനില്‍ പല ഉദ്യോഗങ്ങളും നല്കി. സെക്രട്ടറി ഓഫ് സ്റ്റേറ്റ് കൂടിയായി.
25-ാമത്തെ വയസ്സില്‍ ചാള്‍സ് പൗരോഹിത്യം സ്വീകരിച്ചു. അധികം താമസിയാതെ മിലാനിലെ മെത്രാനായി അഭിഷേകം ചെയ്യപ്പെട്ടു. എന്നാല്‍ ട്രെന്റ് സൂനഹദോസിന്റെ ജോലികള്‍ നിര്‍വ്വഹിക്കാനുണ്ടായിരുന്നതിനാല്‍ അദ്ദേഹം മിലാനില്‍ ചെന്നു താമസിച്ചില്ല. പത്തുകൊല്ലത്തോളം മുടങ്ങിപ്പോയ കൗണ്‍സില്‍ 1562-ല്‍ പുനരാരംഭിക്കുവാന്‍ മാര്‍പാപ്പായെ പ്രേരിപ്പിച്ചതു ബിഷപ് ചാള്‍സാണ്.
ഇടക്കിടയ്ക്ക് കൗണ്‍സില്‍ പിരിഞ്ഞു പോകത്തക്ക സാഹചര്യങ്ങള്‍ ഉളവായിക്കൊണ്ടിരുന്നെങ്കിലും ബിഷപ് ചാള്‍സിന്റെ രഹസ്യപരിശ്രമംകൊണ്ട് സമുചിതമായ അന്ത്യത്തിലെത്തി. അവസാനകാലത്തെ എഴുത്തുകുത്ത് ചാള്‍സ് ഏറ്റെടുത്തു.
സൂനഹദോസു കഴിഞ്ഞ് പൂര്‍ണ്ണസമയവും മിലാന്‍ രൂപതയ്ക്കുവേണ്ടി ചെലവാക്കാന്‍ അദ്ദേഹത്തിനു കഴിഞ്ഞു. ഒരു പ്രാദേശിക സൂനഹദോസു നടത്തി വൈദികരുടെയും അല്‍മേയരുടെയും ജീവിതപരിഷ്‌കരണത്തിനുവേണ്ട പരിപാടികള്‍ നിര്‍ണ്ണയിച്ചു. ജനങ്ങള്‍ മനസ്സുതിരിയണമെങ്കില്‍ വൈദികര്‍ മാതൃകാജീവിതം നയിക്കണമെന്ന് സൂനഹദോസ് ഊന്നിപറഞ്ഞു. ആര്‍ച്ചുബിഷപ് ചാള്‍സ് തന്നെ മാതൃക കാണിച്ച് തനിക്കുള്ള ആദായം മുഴുവനും ഉപവി പ്രവൃത്തികള്‍ക്കായി മാറ്റിവച്ചു.
1567-ലെ പ്ലേഗിനും പഞ്ഞത്തിനുമിടയ്ക്കു അദ്ദേഹം ദിനംപ്രതി 60,000 മുതല്‍ 70,000 പേരെവീതം പോറ്റിക്കൊണ്ടിരുന്നു. വളരെയേറെ സംഖ്യ കടം വാങ്ങിച്ചാണ് ഇത് സാധിച്ചത്. സര്‍ക്കാര്‍ അധികാരികള്‍ ഓടിപ്പോയപ്പോള്‍ ആര്‍ച്ചുബിഷപ് ചാള്‍സ് പ്ലേഗിന്റെ ഇടയില്‍ താമസിച്ചു രോഗികളെ ശുശ്രൂഷിക്കുകയും മരിക്കുന്നവരെ സംസ്‌കരിക്കുകയും ചെയ്തു. മിലാന്‍ രൂപതയിലെ പൊന്നാഭരണങ്ങളെല്ലാം ദരിദ്രര്‍ക്കായി ചെലവഴിച്ചു.
കഠിനമായ അധ്വാനം അദ്ദേഹത്തിന്റെ ആരോഗ്യത്തെ തകര്‍ത്തു. 46-ാമത്തെ വയസ്സില്‍ തന്റെ സമ്മാനം വാങ്ങാനായി ചാള്‍സ് ഈ ലോകത്തോട് യാത്രപറഞ്ഞു. അദ്ദേഹം തന്റെ 3000 വൈദികരേയും സുകൃതജീവിതത്തിലേക്ക് തിരിച്ചുവിട്ട് ആറു ഉത്തമ സെമിനാരികള്‍ സ്ഥാപിച്ചു. ക്രിസ്തീയ തത്വ സഖ്യം സ്ഥാപിച്ച് അതിന്റെ അംഗങ്ങളെ വേദോപദേശം പഠി പ്പിക്കാനിറക്കി, അദ്ദേഹം തന്നെ ചിലപ്പോഴൊക്കെ വൃദ്ധരെ വേദോപദേശം പഠിപ്പിക്കുകയുമുണ്ടായെന്നു കാണുന്നു.
