മദര്‍ തെരേസ ട്രെയ്‌നിങ് സെന്റര്‍ സ്ഥാപക ദിനം ആഘോഷിച്ചു
താമരശ്ശേരി രൂപതയുടെ കീഴില്‍ പുതുപ്പാടിയില്‍ പ്രവര്‍ത്തിക്കുന്ന ഇംഗ്ലീഷ് ഭാഷാ പരിശീലന കേന്ദ്രമായ മദര്‍ തെരേസ ഒഇടി & ഐഇഎല്‍ടിഎസ് ട്രെയ്‌നിങ് സെന്ററിന്റെ ഒമ്പതാം സ്ഥാപക ദിനാഘോഷം രൂപതാ ചാന്‍സലര്‍ ഫാ. ചെറിയാന്‍ പൊങ്ങന്‍പാറ ഉദ്ഘാടനം ചെയ്തു.
ഇന്നിന്റെ പ്രലോഭനങ്ങള്‍പെട്ട് ഒന്നിലും ശ്രദ്ധ കേന്ദ്രീകരിക്കാന്‍ കഴിയാതെ ഉഴലുന്നവര്‍ക്ക് മദര്‍ തെരേസ ട്രെയ്‌നിങ് സെന്ററിലെ വിദ്യാര്‍ത്ഥികള്‍ മാതൃകയാണെന്ന് ഫാ. ചെറിയാന്‍ പൊങ്ങന്‍പാറ അഭിപ്രായപ്പെട്ടു.
ചടങ്ങില്‍ സിഒഡി ഡയറക്ടര്‍ ഫാ. ബിജോ ചെമ്പരത്തിക്കല്‍ അധ്യക്ഷത വഹിച്ചു. കേരള വിദ്യാഭ്യാസ ചരിത്രത്തില്‍ കത്തോലിക്കാസഭ വഹിച്ച വിപ്ലവകരമായ പങ്ക് തമസ്‌ക്കരിച്ച് പുതിയ കഥകള്‍ രചിക്കുന്ന ഇന്നത്തെ സത്യാനന്ധരകാലത്ത് മദര്‍ തെരേസ ട്രെയ്‌നിങ് സെന്റര്‍ ലാഭേച്ഛകൂടാതെയാണ് പ്രവര്‍ത്തിക്കുന്നതെന്ന് ഫാ. ബിജോ ചെമ്പരത്തിക്കല്‍ ഓര്‍മ്മിപ്പിച്ചു.
സിഒഡി അസി. ഡയറക്ടര്‍മാരായ ഫാ. ഷെറിന്‍ പുത്തന്‍പുരയ്ക്കല്‍, ഫാ. ജിജോ കളപ്പുരയ്ക്കല്‍, മാര്‍ ബസേലിയോസ് സ്‌കൂള്‍ സിഇഒ ഫാ. തോമസ് മണ്ണിത്തോട്ടം, മദര്‍ തെരേസ ട്രെയ്‌നിങ് സെന്റര്‍ ഐഇഎല്‍ടിഎസ് എച്ച്ഒഡി കെ. ജെ. തങ്കച്ചന്‍, അലൈന്‍ ആന്‍ ഫിലിപ്പ് എന്നിവര്‍ പ്രസംഗിച്ചു. പ്രിന്‍സിപ്പല്‍ എം. എ. മത്തായി വാര്‍ഷിക റിപ്പോര്‍ട്ട് അവതരിപ്പിച്ചു.
ട്രെയ്‌നിങ് സെന്ററില്‍ ഐഇഎല്‍ടിഎസ്, ഒഇടി കോഴ്‌സുകളില്‍ പരിശീലനം നേടിയ 638 വിദ്യാര്‍ത്ഥികളില്‍ 392 പേര്‍ ഉന്നത വിജയം നേടി. CBT, UKVI കോഴ്‌സുകളില്‍ 100 ശതമാനം വിജയം കൈവരിക്കാന്‍ മദര്‍ തെരേസ ട്രെയ്‌നിങ് സെന്ററിന് സാധിച്ചു.
