ആഗോള സഭയില്‍ മാര്‍പാപ്പ പ്രഖ്യാപിച്ച ജൂബിലി വര്‍ഷത്തില്‍ താമരശ്ശേരി രൂപതാ ബിഷപ് മാര്‍ റെമീജിയോസ് ഇഞ്ചനാനിയിലിന്റെ നേതൃത്വത്തില്‍ രൂപതയിലെ 130 വൈദികര്‍ ഒന്നിച്ച് വേളാങ്കണ്ണി തീര്‍ത്ഥാടനം നടത്തി. താമരശ്ശേരി രൂപതയിലെ വൈദിക കൂട്ടായ്മയുടെ ഐക്യം വിളിച്ചോതിയ തീര്‍ത്ഥാടനം നവംബര്‍ 24-ന് താമരശ്ശേരിയില്‍ നിന്ന് ആരംഭിച്ച് 25-ന് പുലര്‍ച്ചെ വേളാങ്കണ്ണിയില്‍ എത്തിച്ചേര്‍ന്നു. ആത്മീയ നവീകരണത്തിന് ഊന്നല്‍ നല്‍കി കുമ്പസാരം, കുരിശിന്റെ വഴി, ജപമാല, പരിഹാര പ്രദക്ഷിണം എന്നിവ നടത്തി. വേളാങ്കണ്ണിയിലെ വിവിധ ദേവാലയങ്ങള്‍ സന്ദര്‍ശിച്ചു. വിശുദ്ധ കുര്‍ബാനയില്‍ റൂബി ജൂബിലി നിറവില്‍ നില്‍ക്കുന്ന രൂപതയ്ക്കും ഇടവക ജനത്തിനുമായി വൈദികര്‍ പ്രാര്‍ത്ഥിച്ചു.
നവംബര്‍ 25-ന് ബിഷപ് മാര്‍ റെമീജിയോസ് ഇഞ്ചനാനിയിലിന്റെ മുഖ്യകാര്‍മികത്വത്തില്‍ കൃതജ്ഞതാ ബലിയര്‍പ്പിച്ചു. പൗരോഹിത്യ രജത ജൂബിലി ആഘോഷിക്കുന്ന ഫാ. അബ്രഹാം കാവില്‍പുരയിടത്തില്‍, ഫാ. ജോര്‍ജ് കളത്തൂര്‍, ഫാ. ആന്റോ മൂലയില്‍, ഫാ. ജോസഫ് മുകളേപ്പറമ്പില്‍, ഫാ. ജോസഫ് പുത്തേട്ടുപടവില്‍, ഫാ. ആന്റണി ചെന്നിക്കര, ഫാ. ഫ്രാന്‍സിസ് കൊച്ചുമുണ്ടന്‍മലയില്‍, ഫാ. ജോസ് പെണ്ണാപറമ്പില്‍, വിശ്രമ ജീവിതത്തിനൊരുങ്ങുന്ന ഫാ. മാത്യു കണ്ടശാംകുന്നേല്‍ എന്നിവരെ അനുമോദിച്ചു.
തഞ്ചാവൂര്‍ രൂപതയുടെ പാസ്റ്ററല്‍ സെന്റര്‍ തീര്‍ത്ഥാടക സംഘം സന്ദര്‍ശിച്ചു. നവംബര്‍ 27-ന് തീര്‍ത്ഥാടക സംഘം താമരശ്ശേരിയില്‍ തിരിച്ചെത്തി.
വികാരി ജനറല്‍ മോണ്‍. അബ്രഹാം വയലില്‍, ചാന്‍സലര്‍ ഫാ. സുബിന്‍ കാവളക്കാട്ട്, ഫിനാന്‍സ് ഓഫീസര്‍ ഫാ. ബെന്നി മുണ്ടനാട്ട്, ഫാ. സായി പാറന്‍കുളങ്ങര, ഫാ. ജില്‍സ് കാരികുന്നേല്‍ എന്നിവര്‍ തീര്‍ത്ഥാടനത്തിന് നേതൃത്വം നല്‍കി.
