ബാംഗ്ലൂരു ക്രൈസ്റ്റ് യൂണിവേഴ്സിറ്റിയില് 2023 ഒക്ടോബര് 21 മുതല് 24 വരെ നടക്കുന്ന ജീസസ് യൂത്ത് നാഷണല് കോണ്ഫറന്സിനുവേണ്ടിയുള്ള മദ്ധ്യസ്ഥ പ്രാര്ത്ഥനയുടെ ഭാഗമായി വിശുദ്ധ ജോണ്പോള് രണ്ടാമന് മാര്പാപ്പയുടെ തിരുശേഷിപ്പ് പ്രയാണം ആരംഭിച്ചു. തിരുശേഷിപ്പുമായി ഇന്ത്യ ഉടനീളം സഞ്ചരിക്കും. ജാഗോ യാത്ര എന്ന പേര് നല്കിയിരിക്കുന്ന തിരുശേഷിപ്പ് പ്രയാണത്തിന്റെ ആറാം ഘട്ടം താമരശ്ശേരി രൂപതയുടെ ഭാഗമായ മലപ്പുറം കോഴിക്കോട് ജില്ലകളില് പ്രയാണം പൂര്ത്തിയാക്കി.
പാലക്കാട് രൂപതയിലെ പെരുമ്പടാരി (മണ്ണാര്ക്കാട്) ഹോളി സ്പിരറ്റ് ഫൊറോനാ ദൈവാലയത്തില് നിന്നാണ് കോഴിക്കോട് സോണ് തിരുശേഷിപ്പ് ഏറ്റുവാങ്ങിയത്. തുടര്ന്ന് താമരശ്ശേരി, കോഴിക്കോട് രൂപതകളില് പ്രയാണം നടത്തി. പ്രയാണത്തിന്റെ ഭാഗമായി താമരശ്ശേരി, കോഴിക്കോട് ബിഷപ്സ് ഹൗസുകളിലും തിരുശേഷിപ്പ് എത്തിച്ചു.
താമരശ്ശേരി രൂപതയിലൂടെ നടന്ന തിരുശേഷിപ്പ് പ്രയാണത്തില് നിരവധി വിശ്വാസികള് പങ്കുചേര്ന്നു. ഇതിനോടകം നാനൂറ് കിലോമീറ്ററുകള് താണ്ടിയ തിരുശേഷിപ്പ് പ്രയാണം മാനന്തവാടി രൂപതയിലേക്ക് പ്രവേശിച്ചു. ചാത്തന്കോട്ടുനട സെന്റ് മേരീസ് കണ്വെന്ഷന് സെന്ററില് നടന്ന ചടങ്ങില് മാനന്തവാടി സോണിന് തിരുശേഷിപ്പ് കൈമാറി.
