ഫാ. മാത്യു തകിടിയേല്‍ നിര്യാതനായി
താമരശ്ശേരി രൂപതാ വൈദികന്‍ ഫാ. മാത്യു തകിടിയേല്‍ (73) നിര്യാതനായി. ശാരീരിക ബുദ്ധിമുട്ടുകളെത്തുടര്‍ന്ന് ചികിത്സയിലായിരുന്നു. ഭൗതികദേഹം വ്യാഴാഴ്ച (26-10-2023) ഉച്ചയ്ക്ക് ഒരു മണി വരെ സഹോദരന്‍ വക്കച്ചന്റെ ചാപ്പന്‍തോട്ടത്തിലുള്ള ഭവനത്തില്‍ പൊതുദര്‍ശനത്തിനുവയ്ക്കും. തുടര്‍ന്ന് ചാപ്പന്‍തോട്ടം സെന്റ് ജോസഫ് പള്ളിയില്‍ പൊതുദര്‍ശനം. സംസ്‌ക്കാര ശുശ്രൂഷ വ്യാഴാഴ്ച വൈകുന്നേരം നാലു മണിക്ക് ബിഷപ് മാര്‍ റെമീജിയോസ് ഇഞ്ചനാനിയിലിന്റെ മുഖ്യകാര്‍മ്മികത്വത്തില്‍ നടക്കും.
കുടിയേറ്റത്തിന്റെ ആദ്യനാളുകളില്‍ അസൗകര്യങ്ങള്‍ മാത്രം കൈമുതലായിരുന്ന ഇടവകകളില്‍ ശക്തമായ നേതൃത്വവും കഠിനാദ്ധ്വാനവുംകൊണ്ട് ഇടവക ജനത്തെ മുന്നോട്ടു നയിച്ച അജപാലകനായിരുന്നു ഫാ. മാത്യു തകിടിയേല്‍. 1950 ജൂണ്‍ 30ന് ചാപ്പന്‍തോട്ടം തകിടിയേല്‍ ജോസഫ് – മേരി ദമ്പതികളുടെ പന്ത്രണ്ടു മക്കളില്‍ രണ്ടാമനായി ജനിച്ചു. ഹൈസ്‌ക്കൂള്‍ വിദ്യാഭ്യാസം ഭരണങ്ങാനത്ത് പൂര്‍ത്തിയാക്കി ശേഷം തലശ്ശേരി രൂപതയിലെ മൈനര്‍ സെമിനാരിയില്‍ ചേര്‍ന്നു. മംഗലപ്പുഴ സെന്റ് ജോസഫ്‌സ് പൊന്തിഫിക്കല്‍ സെമിനാരിയില്‍ നിന്നും തത്വശാസ്ത്ര, ദൈവശാസ്ത്ര പഠനങ്ങള്‍ പൂര്‍ത്തിയാക്കി. തലശ്ശേരി രൂപതയ്ക്കു വേണ്ടി 1975 ഡിസംബര്‍ 23ന് മാര്‍ സെബാസ്റ്റ്യന്‍ വള്ളോപ്പിള്ളിയില്‍ നിന്ന് വൈദികപട്ടം സ്വീകരിച്ചു. വിലങ്ങാട് ഇടവക അസി. വികാരിയായി ആദ്യ നിയമനം ലഭിച്ചു. തുടര്‍ന്ന് കൂടരഞ്ഞി ഇടവകയില്‍ അസി. വികാരിയായി. പിന്നീട് വിജയപുരി (തലശ്ശേരി അതിരൂപത), പൂഴിത്തോട്, ചെമ്പുകടവ്, ചക്കിട്ടപാറ, പുഷ്പഗിരി, വിലങ്ങാട്, പെരുവണ്ണാമൂഴി ഇടവകകളില്‍ വികാരിയായി സേവനം ചെയ്തു. പെരുവണ്ണാമൂഴിയില്‍ വികാരിയായിരിക്കെയാണ് കഴിഞ്ഞ ആഗസ്റ്റില്‍ ശാരീരിക ബുദ്ധിമുട്ടുകളെത്തുടര്‍ന്ന് ചികിത്സയ്ക്കായി സ്വഭവനത്തിലേക്കു പോയത്.
