ബഥാനിയായില്‍ അഖണ്ഡ ജപമാല സമര്‍പ്പണം ഇന്ന് ആരംഭിക്കും
പുല്ലൂരാംപാറ: താമരശ്ശേരി രൂപതയുടെ ആത്മീയ നവീകരണ കേന്ദ്രമായ ബഥാനിയ റിന്യൂവല്‍ സെന്ററില്‍ 101 ദിനരാത്രങ്ങള്‍ നീളുന്ന അഖണ്ഡ ജപമാല സമര്‍പ്പണത്തിന് ഇന്ന് തുടക്കമാകും. രാവിലെ 9.30ന് ഗാനശുശ്രൂഷയും 10 ന് കുരിശിന്റെ വഴിയും നടക്കും. 10.45ന് ദിവ്യകാരുണ്യ ആരാധന. 11.30ന് നടക്കുന്ന വിശുദ്ധ കുര്‍ബാനയില്‍ ബിഷപ് മാര്‍ റെമീജിയോസ് ഇഞ്ചനാനിയില്‍ മുഖ്യകാര്‍മികത്വം വഹിക്കും. ലോക സമാധാനവും കുടുംബ വിശുദ്ധീകരണവുമാണ് ഈ വര്‍ഷത്തെ നിയോഗം.
തുടര്‍ന്ന് ഒരു മണിയോടെ ദിവ്യകാരുണ്യ ആരാധനയും ജപമാല സമര്‍പ്പണവും ആരംഭിക്കും. 1.15ന് നേര്‍ച്ച ഭക്ഷണം ക്രമീകരിച്ചിട്ടുണ്ട്. വൈകിട്ട് 3ന് കരുണക്കൊന്തയും കുരിശിന്റെ വഴിയും നടക്കും. വൈകുന്നേരം എഴു മണിക്ക് വിശുദ്ധ കുര്‍ബാനയുണ്ടാകും.
എല്ലാ വര്‍ഷവും നടത്തിവരുന്ന അഖണ്ഡ ജപമാലയിലും ദിവ്യകാരുണ്യ ആരാധനയിലും വിവിധ ജില്ലകളില്‍ നിന്നായി നിരവധി വിശ്വാസികള്‍ പങ്കെടുക്കാറുണ്ട്. പൊതുവായ നിയോഗങ്ങളോടൊപ്പം വ്യക്തിപരമായ നിയോഗങ്ങളും സമര്‍പ്പിച്ച് പ്രാര്‍ത്ഥിക്കാവുന്നതാണ്. ആരാധനയ്ക്ക് ആവശ്യമായ എണ്ണ, മെഴുകുതിരി, കുന്തിരിക്കം എന്നിവ നേര്‍ച്ചയായി സമര്‍പ്പിക്കാനുള്ള സൗകര്യവുമുണ്ട്. എല്ലാ ദിവസവും പകല്‍ സമയങ്ങളില്‍ വിശുദ്ധ കുമ്പസാരത്തിനും കൗണ്‍സിലിങ്ങിനുമുള്ള സൗകര്യം ഒരുക്കിയിട്ടുണ്ട്.
