നവംബര്‍ 25: വിശുദ്ധ കാതറിന്‍ കന്യക
മാക്‌സിമിനൂസു ചക്രവര്‍ത്തിയുടെ കാലത്ത് അലെക് സാന്‍ഡ്രിയായില്‍ ജീവിച്ചിരുന്ന മഹാ പണ്ഡിതയായ ഒരു കന്യകയാണ് കാതറിന്‍. രാജകുടുംബത്തിലാണ് അവളുടെ ജനനം. ചക്രവര്‍ത്തിയുടെ നിര്‍ദ്ദേശപ്രകാരം അദ്ദേഹം നിയോഗിച്ച വിജാതീയ തത്വശാസ്ത്രജ്ഞരോടു തര്‍ക്കിച്ചു രാജകുമാരി അവരെ പരാജയപ്പെടുത്തി ക്രിസ്തുമതത്തിലേക്ക് ആനയിച്ചു. അക്കാരണത്താല്‍ ചക്രവര്‍ത്തി അവരെ തീയില്‍ ദഹിപ്പിച്ചു.
മാക്സിമിന്റെ മൃഗീയമായ കാമത്തെ ശമിപ്പിക്കാന്‍ അദ്ദേഹം അവളെ ക്ഷണിച്ചു. ചത്താലും തന്റെ ചാരിത്ര്യത്തെ നഷ്ടപ്പെടുത്തുകയില്ലെന്നായിരുന്നു കാതറിന്റെ നിശ്ചയം. പല പ്രാവശ്യം നിര്‍ബ്ബന്ധിച്ചിട്ടും ചക്രവര്‍ത്തിയുടെ കാമവെറിക്കു വഴിപ്പെടാത്തതിനാല്‍ കാതറിന്റെ വസ്തുക്കള്‍ കണ്ടു കെട്ടി അവളെ നാടുകടത്തി. കുറേ കഴിഞ്ഞ് അവളെ തിരിച്ചു വിളിച്ചു വീണ്ടും പാപത്തിന് നിര്‍ബന്ധിച്ചിട്ട് അവള്‍ അതിനു സമ്മതിക്കാഞ്ഞതിനാല്‍ ഒരു യന്ത്രത്തില്‍ കിടത്തി അവയവങ്ങള്‍ വലിച്ചുകീറിച്ചു അനന്തരം അവളുടെ ശിരസ്സ് ഛേദിച്ചു കളഞ്ഞു.
ഈ രക്തസാക്ഷിണിയുടെ അസാധാരണ പാണ്ഡിത്യവും ദൈവഭക്തിയും പരിഗണിച്ചു സ്‌കൂളുകള്‍ അവളെ മധ്യസ്ഥയായി തിരഞ്ഞെടുത്തു; തത്വശാസ്ത്രജ്ഞന്മാര്‍ക്ക് മാതൃകയായി. രക്തസാക്ഷികള്‍ പ്രദര്‍ശിപ്പിക്കുന്ന മനോധൈര്യം അവരുടെ പൂര്‍വ്വകാലജീവിതത്തില്‍നിന്നു വേര്‍തിരിച്ചു പരിഗണിക്കാവുന്നതല്ല; അവരുടെ ജീവിതത്തിന്റെ സ്വാഭാവിക ഫലമാണ്. രക്തസാക്ഷികളെപ്പോലെ അവസാനംവരെ സഹനത്തില്‍ നിലനില്‍ക്കണമെങ്കില്‍ അവരെപ്പോലെ ദൈവവരപ്രസാദത്തോടു വിശ്വസ്തത പ്രദര്‍ശിപ്പിക്കുക.
