ആരാധനാസ്വാതന്ത്ര്യം സംരക്ഷിക്കാന്‍ കര്‍ശന നടപടി വേണം; ആവര്‍ത്തിക്കുന്ന സംഭവങ്ങള്‍ ഗൗരവമായി കാണണമെന്ന് താമരശ്ശേരി രൂപതാ സമിതി
കരുവാരക്കുണ്ട് ഹോളി ഫാമിലി ഫൊറോന പള്ളിയില്‍ വിശുദ്ധ കുര്‍ബാനയ്ക്കിടെ അതിക്രമിച്ചുകയറി ആരാധന തടസ്സപ്പെടുത്തിയ സംഭവത്തില്‍ സമഗ്ര അന്വേഷണം നടത്തി കുറ്റക്കാര്‍ക്കെതിരെ നിയമനടപടി സ്വീകരിക്കണമെന്ന് കത്തോലിക്ക കോണ്‍ഗ്രസ് താമരശ്ശേരി രൂപത ആവശ്യപ്പെട്ടു. ക്രൈസ്തവ ആരാധനാലയങ്ങളില്‍ സമാനമായ സംഭവങ്ങള്‍ ആവര്‍ത്തിക്കുന്ന സാഹചര്യത്തില്‍ ഇതിനു പിന്നിലെ സാഹചര്യങ്ങളും ലക്ഷ്യങ്ങളും അന്വേഷിച്ച് ഉത്തരവാദികളെ നിയമത്തിനു മുന്നില്‍ കൊണ്ടുവരണമെന്നും സംഘടന ആവശ്യപ്പെട്ടു.
ഒക്ടോബര്‍ 11 ഞായറാഴ്ച രാവിലെ 6.30ന് നടന്ന വിശുദ്ധ കുര്‍ബാനയ്ക്കിടെയാണ് സംഭവം. പള്ളിയുടെ വശത്തുള്ള വാതിലിലൂടെ അകത്തുകയറിയ വ്യക്തി ബലിയര്‍പ്പണം നടന്നുകൊണ്ടിരുന്ന അള്‍ത്താരയുടെ സമീപത്തേക്ക് എത്തുകയും ക്രിസ്തുവിന്റെ രൂപത്തെ അവഹേളിക്കുന്ന തരത്തില്‍ സംസാരിക്കുകയും ബലിയര്‍പ്പിച്ചുകൊണ്ടിരുന്ന വൈദികനോട് ഇറങ്ങിവരാന്‍ ആക്രോശിക്കുകയും ചെയ്തു. വിശ്വാസികള്‍ ഇടപെട്ട് ഇയാളെ പിടികൂടി പോലീസിന് കൈമാറുകയായിരുന്നു.
താമരശ്ശേരി രൂപതയുടെ കീഴിലുള്ള മറ്റു രണ്ട് പള്ളികളിലും ഇതിനു മുന്‍പ് വിശുദ്ധ കുര്‍ബാനയ്ക്കിടെ പുറത്തുനിന്നെത്തിയ വ്യക്തികള്‍ അതിക്രമിച്ചുകയറി പ്രശ്‌നങ്ങള്‍ സൃഷ്ടിച്ചിട്ടുണ്ടെന്ന് സംഘടന ചൂണ്ടിക്കാട്ടി. ക്രിസ്മസ് കാലത്ത് പുല്‍ക്കൂട്ടില്‍ സ്ഥാപിച്ചിരുന്ന ഉണ്ണിയേശുവിന്റെ രൂപം എടുത്തുകൊണ്ടുപോയതും വിശുദ്ധ ബൈബിള്‍ കത്തിച്ചതുമായി ബന്ധപ്പെട്ട സംഭവങ്ങളും പ്രസ്താവനയില്‍ പരാമര്‍ശിക്കുന്നുണ്ട്.
ആരാധനാലയങ്ങള്‍ക്കുനേരെ ആവര്‍ത്തിക്കുന്ന ഇത്തരം സംഭവങ്ങളെ ഒറ്റപ്പെട്ട സംഭവങ്ങളായി മാത്രം കാണാനാവില്ലെന്നാണ് കത്തോലിക്ക കോണ്‍ഗ്രസിന്റെ നിലപാട്. സംഭവങ്ങളുടെ പശ്ചാത്തലവും പിന്നിലുള്ള ലക്ഷ്യങ്ങളും വിശദമായി അന്വേഷിച്ച് കുറ്റക്കാര്‍ക്കെതിരെ നിയമാനുസൃത നടപടി സ്വീകരിക്കാന്‍ ഉത്തരവാദപ്പെട്ടവര്‍ അടിയന്തരമായി ഇടപെടണമെന്നും സംഘടന ആവശ്യപ്പെട്ടു.
ആരാധനാസ്വാതന്ത്ര്യത്തെ വെല്ലുവിളിക്കുകയും വിശ്വാസികളുടെ മതവികാരത്തെ വ്രണപ്പെടുത്തുകയും ചെയ്യുന്ന നടപടികള്‍ തടയാന്‍ ശക്തമായ ഇടപെടല്‍ വേണം. ഇത്തരം പ്രവൃത്തികള്‍ക്ക് പിന്തുണ നല്‍കുന്നവരുണ്ടെങ്കില്‍ അവരെയും നിയമത്തിനു മുന്നില്‍ കൊണ്ടുവരണമെന്നും കത്തോലിക്ക കോണ്‍ഗ്രസ് ആവശ്യപ്പെട്ടു. ആവശ്യമായ നടപടികള്‍ സ്വീകരിച്ചില്ലെങ്കില്‍ ശക്തമായ പ്രതിഷേധ പരിപാടികളുമായി മുന്നോട്ടുപോകുമെന്നും മുന്നറിയിപ്പ് നല്‍കി.
കേരളത്തിലെ മതേതര സമൂഹം ഇത്തരം വിഷയങ്ങളില്‍ ഒരുമിച്ച് ഇടപെടണമെന്നും ആരാധനാലയങ്ങളുടെ സുരക്ഷയും വിശ്വാസികളുടെ ആരാധനാസ്വാതന്ത്ര്യവും ഉറപ്പാക്കാന്‍ കൂട്ടായ ശ്രമങ്ങള്‍ ഉണ്ടാകണമെന്നും കത്തോലിക്ക കോണ്‍ഗ്രസ് താമരശ്ശേരി രൂപതയുടെ പ്രസ്താവനയില്‍ ആഹ്വാനം ചെയ്തു.
