ഡിസംബര്‍ 18: വിശുദ്ധ റൂഫസ്സും സോസിമൂസ്സും (രക്തസാക്ഷികള്‍)
107-ാം ആണ്ടില്‍ ട്രാജന്‍ ചക്രവര്‍ത്തിയുടെ കീഴില്‍ രക്തസാക്ഷിത്വം വഹിച്ചവരാണ് റൂഫസ്സും സോസിമൂസും. വിശുദ്ധ പോളിക്കാര്‍പ്പ് അവരെപ്പറ്റിപറയുന്നു, ”അവര്‍ വൃഥാ അല്ല വിശ്വാസത്തോടും നീതിയോടും കൂടിയാണ് ഓടിയത്. കര്‍ത്താവില്‍ നിന്നും ലഭിക്കേണ്ട സമ്മാനം വാങ്ങാന്‍ അവര്‍ പോയി. അവിടുത്തോടുക്കൂടി അവര്‍ സഹിച്ചു. അവര്‍ ഈ ലോകത്തിന്റെ ആര്‍ഭാടങ്ങളെയല്ല, നമുക്കുവേണ്ടി മരിക്കുകയും ദൈവം ഉയര്‍പ്പിക്കുകയും ചെയ്തവനെയാണ് സ്‌നേഹിച്ചത്.”
ഫിലിപ്പിയാക്കാരായ ഈ രണ്ട് ക്തസാക്ഷികള്‍ അന്ത്യോക്യായിലെ ഇഗ്നേഷ്യസിന്റെ കൂടെ റോമായിലേക്ക് വരികയും ഇഗ്നേഷ്യസിനെ സിംഹത്തിന് ഇട്ടുകൊടുക്കുന്നതിന് രണ്ട് ദിവസം മുമ്പ് ഇവരെ വന്യമൃഗങ്ങള്‍ക്ക് എറിഞ്ഞുകൊടുക്കുകയുമാണ് ചെയ്തത്. ഫിലിപ്പിയാക്കാര്‍ക്കുള്ള എഴുത്തില്‍ പോളിക്കാര്‍പ്പ് ആ നാട്ടുകാരോടു ചോദിക്കുന്നു: ”ഇഗ്നേഷ്യസും സോസിമൂസും റൂഫസും ക്ഷമയോടെ സഹിച്ചു മരിച്ചത് നിങ്ങളുടെ കണ്ണുകള്‍ കൊണ്ട്തന്നെ നിങ്ങള്‍ കണ്ടിട്ടുള്ളതല്ലേ.” ക്രിസ്തുവിനെ പ്രതി സഹിക്കുവാന്‍ ക്ഷണിക്കപ്പെട്ടതുകൊണ്ട് റൂഫസ്സും സോസിമൂസും ആനന്ദം കൊണ്ടു.
